大導演搭老闆書之「碰壁」

大導演:老闆，我話晒都係大導演，點都要拍一次驚天古裝大製作，之前我交份赤壁既Proposal點睇?

大老闆:我睇過，幾好，呢期中國市場最重要，我地當然支持玩大佢，咁要幾錢?

大導演:8000萬美金啦，一係唔拍，一拍我就要拍一齣中國史上最大既大片。

大老闆:好，好好，錢無問題，市務部話中國市場最buy大大大大大片，大導演你有咁大搞咁大啦。

大導演:多謝老闆，我會搵齊中港台最紅既紅星一齊上陣。

大老闆:喂，我地有日本投資人喎，加個日本演員啦。

大導演:係係係，一於加個日本男星，一於中港日台型男盡出。

大老闆:等陣，搵幾個靚女呢睇下啦，商業片點都要搞o的床上戲，順便搵多個靚女做女戰士啦，我地鬼佬最buy呢o的巾幗英雄。

大導演:老闆，我地中國人打仗邊有女人??

大老闆:叫你就做啦，話時話，你之前比我睇份劇本咁Q多政治內容，又乜乜官渡問題，又乜乜統一戰略，咁煩o的女性觀眾比你悶死晒啦，快快手手搞兩場文場就打啦。拿，我度好左架啦，一於話曹操要捉周俞條女小喬返銅雀樓相好，所以發兵，咁咪簡單易明囉，幾時爭女都係最受師奶歡迎既橋呢，你冇睇你祖家無線o的電視劇既咩，你記唔記得邊個先係老闆呀。

大導演:知道知道，老闆講得o岩，觀眾先係老闆。

大老闆:我地做生意最緊要照顧全世界客仔，仲有仲有，我地美國佬呢期最鐘意睇Chinese Ku Fung，你睇下搵八爺定東哥啦，最緊要打到飛上飛落，我最鐘意睇Chinese Superman。

大導演:我地而家拍戰爭片唔係武俠片喎，點可以飛來飛去呀，我地古時打仗主要都係馬戰，武將主要靠馬力同對方衝撞打殺。

大老闆:超，我地鬼佬觀眾理Q你乜片，總之係古裝就要打打打，算啦，我尊重你，唔吊威也都得，但o的武將點都要落馬打多o的招數呢睇下，一個打一百個卒仔，最好各有絕招，出招時叫埋「關羽偃月斬」「玄德雙飛劍」咁啦。

大導演:(心聲)Oh My God!

大老闆:仲有仲有，咪話唔教精你，一定要照顧埋歐洲觀眾，加多場功夫足球就fit晒。

大導演:唔係掛老闆，打緊仗喎，邊有心情踢波。

大老闆:丫所以話你呢，蹴踘係你地黃帝時代流傳落呢既玩意，呢o的玩意唔係用呢操兵你話用呢做乜勒，加入戲度好合理丫，哈哈哈，做得你老闆，我都識中國歷史既，照做啦。

大導演:係既老闆，話時話，搞咁多野我諗齣戲要成三個鐘，我驚影響票房喎。

大老闆:呢所以話呢你，生意既野你識鬼咩。拿，你同我再拍長o的，到時華人同日韓地區就分上下集，一集暑假上，一集年尾上，殺佢兩張飛錢，鬼佬market就等年尾先一集過，剪個「三國無雙之赤壁-格鬥天下特別版」咁錢就搵到盡啦。

大導演:係既係既，咁...老闆大人，放白鴿果度...

大老闆:唔...大導演，我雖然多意見，但最終都係尊重你既，套戲係你既，當然要放白鴿啦，唔比你放你都訓唔著啦，拿拿，一定要白色，用CG做，飛既時候要有動感，由上面PAN落呢睇到地面風景，順便Show下大場面咁啦，小小意見，唔迫你，照做啦。

大導演:鳴...知我者老闆也，多 謝 你 老 闆!