大家好，失蹤左個幾月，相信好多朋友都擔心好味超人交易現場兩位交易員係咪已經輸死左。好好彩，我地不單冇乜事，仲食到過去半個月既反彈浪搵到多少過年經費，呢個時候已經平左倉佈置聖誕樹。
睇呢睇去，家陣呢個時候就真係冇野好買，鑽石山股神billy仲危言聳聽話而家好似六月時個反彈浪，隨時到頂回落，而且回落的話幅度唔少咁話；問埋落馬洲狙擊手Edmond仲嚇死，佢話佢都平左倉等出埋第二隻腳先買貨，乜話！之前乜腳都出晒啦下嘩？佢竟然話10600可能只係第一隻腳，第二隻仲未出。
我個人睇又冇咁淡，之但係呢個時候我都睇個市要回，主要原因係包括Billy既圖表分析同埋美國聖誕消費唔樂觀，唔會買貨。而短期會留意匯豐PUT，今年一反傳統，摶佢唔做Windows Dressing，箇中理由，下回分解。
2008年12月18日 星期四
2008年10月30日 星期四
生死衝浪之地獄過山車
冇寫幾日股票相信好多朋友都有o的掛住好味超人交易現場既兩位交易員啦，請放心，我地冇輸死，相反仲因為冒死衝浪有o的斬獲。講返個市，呢幾日大家又再玩地獄過山車，相信都已經嚇過半死，當大家以為香港28號奇蹟反彈1580點已經好神奇既時候，美國又再呢一個大奇蹟日，一口氣升個889點比大家睇下，已經係一個月唔夠既第二次大奇蹟日。雖然美國實在冇乜大利好消息，減息已經預左，只係減多定減少，但市場氣氛仍然大幅好轉，似乎大家都叫做定一定可以諗諗下一步點玩法。
根據過往經驗，超短炒作可以炒埋今日，到聽日宣佈減息後往往就會回吐，所以我地之前撈底既貨可能要係今日先走一轉，然後再等回返又買過。我睇法係今次反彈同年初非常相似，以上次反彈20-25%計，今次應可反彈到13200或者多少少，所以超短線或者day trade主要都係睇住呢個估計頂位，而想玩PUT既話技術上可以係過左13200後先佈署。
至於中線呢睇，港股既PE已經跌到97後既新低，除非國內經濟大幅倒退或者再發生無法預知既大鑊野，否則可以吸納一o的優質港股作投資。鑽石山股神Billy既意見係呢緊幾個月主要炒波幅，估計係11000-17000上落，樂觀睇中線反彈可以去到18500，之後就會進入橫行區收窄波幅成交下降。如果佢既講法成立的話，除左港交所同內房股之外其他優質國企藍籌都可以收集。
好，開市啦，大家一齊出去衝浪啦！
2008年10月14日 星期二
生死衝浪之終極刺激 14-10-2008
呢幾日股市出現以下奇景：
1. 10月10日DJI幾分鐘升七百幾點，再呢上下大幅波動，全日收跌百幾點，波幅超過1000點破晒記錄。
2. 10月13日HSI由跌轉升，大升1515點(+10.2%)，同日全球股市亦齊齊飛升。
3. DJI絶地反彈，大升936點，相信是單日升幅記錄。
三日之內，股民踏過左受審判，落地獄，復活，升天之路。
今朝起身，睇到上圖，以為HSI又升九百幾點，點知睇清楚，原來係DJI！！乜話，DJI一日升九百幾點！！真係一百歲唔死都有新聞聽。只需要48小時，市場已經可以由極端悲觀變成極端樂觀，G7開左個冇乜結果既大會，結果市場解讀為全球聯手救市大行動，全球股市齊升，連LIBOR都應聲下調。
呢種市況，完全就係教科書講既熊三或熊四現象，即市場上消息主導，大幅上落，經過一段時間之後成交就會慢慢縮減，然後波幅收窄進入橫行區。我睇港股既橫行區應該係16000-18000點之間，然後股市會由整體經濟同公司業績主導個別發展，投資股票既散戶減少，市場又再重新儲備動力等候下一個全民皆股既瘋狂牛市。
講返尋日即市操作，上午個市冇乜動力，正當大家躊躇緊好唔好沽貨時候，個市忽然間復活，食Lunch時，阿爺更加忽然發力，有傳因為新農地法利好經濟，上海股市雞犬皆升，其中國壽更差o的升爆機，上証企穩可以話替全球股市打一支強心針，阿爺又一次保衛地球。港股受阿爺帶動，指數即時飛升，Billy愛股2628更奇績地上演一幕直升機式大升。好味超人交易現場兩位交易員即時O嘴，我問Billy沽唔沽貨，Billy有以下金句：
「唔沽，呢o的大反彈通常唔會彈一日，彈一日好多人唔信未入市，中計既人唔夠多點搵錢呀，梗要升多兩日先收網打盡水中魚。」(當左自己係大戶!?)
我地結論係等等等，果然升完可以再升，大上大落既股市，刺激過過山車。今日即市策略係不買不賣，升破17000就出一o的貨減磅再等機會。Cash is King係熊市金律，暫時我地都要多持現金同保持”現金存倉時間＞股票存倉時間”既原則。所以今個星期都係獲利吐現為主，儲備彈藥等下一個浪呢既時候再去衝浪。
2008年10月10日 星期五
生死衝浪 2008-10-10
所謂股災，其實係信心危機，大約每十年就有一次，一生人可以遇上幾次，而我地家陣就遇上可能係歷史上未遇過咁大劑既金融危機。果然如王冠一教授年頭所言，歐洲金融機構一定會受美國影響而出事，呢兩日歐洲真係人心惶惶，各國政府都要為國內既銀行注資，要留意既係英國甚至係注錢入銀行系統外仲入股銀行，即係各國都發覺而家係金融系統出現問題，現代經濟建基於人對金融系統既信任，如果金融系統出事就唔係經濟問題而係社會問題。冰島呢個小國就首當其沖出事，幣值急瀉，銀行出現倒閉危機，最好笑係個政府都就呢要申請破產，唔知破左產之後係咪會有執達吏將佢成個國家拎出呢拍賣，到時比阿爺BID到就好玩。
而家世界各國最大既問題係銀行借唔到錢出又借唔到錢入，有水既銀行唔敢借比同業驚佢摺埋，冇水既銀行平時靠拆借渡日既就借唔到錢只有發狂賣野同call loan，咁會出現乜情況呢?遠既唔洗睇，就睇我地香港賣成衣既U-Right就即時比人call死，如果銀行平時唔係好急錢通常會揀拖一拖好過申請個客清盤一鑊熟，而家好明顯係銀行都狗急跳牆，相信呢類事件仲陸續有呢。最壞會係金融系統癱瘓導致商業社會無法運作，因而令銀行運作困難甚至執笠，大家都唔信銀行最後個個買夾萬放實金係屋企(銀紙都信唔過啦!)，到時仲大劑過大擠提。
講返股市，尋日HSI反彈511點大家都好開心，我地冇走貨，諗住睇多日，似乎係錯誤既決定，睇呢今日又要跌1000點以上，15000點呢個位相信都守唔到，唯一既希望就係阿爺跌少o的頂住我地，咁收市都仲有可能跌少o的收場。如果冇貨係手既朋友不妨睇位買野摶反彈，買乜已經冇所謂，反正呢個時候已經冇乜技術分析可言，總之打開大利市機見到邊隻指數股跌得最勁就買邊隻，定個止蝕位就OK。仲夠膽玩!?鑽石山股神話齋:「怕死就唔會打風去滑浪啦。」
呢個市咁恐慌，相信大家而經乜野壞息消息都聽過，唔差在比多少少我地好味超人交易現場既民間極端意見比大家參考下。
Billy:「歐洲而家唔係小問題，可能有銀行執笠。」
Billy:「邊個話唔可以連開十鋪細，日本股市連開一百鋪細都係咁啦。」
Billy:「唔洗咁驚，港股最多跌到月尾，因為日日跌一千到時變０點。」
超人媽媽:「阿仔，中移動唔急買丫，隻野廿蚊升上呢，你估佢唔會跌返去廿蚊咩。」
好味超人:「911時DJI低位7500，係金融世界呢講而家大鑊好多，我諗要試返911個低位。」
好味超人:「而家大鑊過97年，當年係亞洲金融風暴，而家係美國金融海嘯，美國一個州GDP已經多過泰國全國。」
2008年10月6日 星期一
股海衝浪 6-10-2008
今日港股有幾大鑊相信大家都睇到，一開市已經玩個大裂口冇問題，反正大家早有心理準備，之但係lunch之後阿爺唔生性，上証跌到出晒界，咁既勢態港股自然跌到飛出街，結果全日跌878點，創兩年收市新低。
1. 聽日放假去拜山。
2. 星期二美國有業績公佈，唔好既多。
3. 星期三雷曼苦主包圍立法會。(依，呢個好玩喎!!)
聽落好有道理，結果懸崖勒馬無買貨安心食lunch，點知下午越跌越多。
2:48PM，係我地既好味超人交易現場有以下精警對白：
好味超人：「跌成七百幾點，o的野好抵喎，買唔買貨？」
Billy：「呢o的位，乜都抵，睇緊2628。」
好味超人：「喂，上証跌到出晒界，個chart都顯示唔到喎(見上圖)，仲玩國企怕唔怕呀？」
Billy：「唔怕，阿爺會做野。」
好味超人：「阿爺尋日咪做左野囉，唔升喎，怕唔怕？」
Billy：「唔怕，阿爺過幾日開三中，冇理由呢頭開會果頭股災。」
好味超人：「有見地有見地。」
Billy：「咁你買唔買貨？」
好味超人：「買左啦，中石油。」
Billy：「嘩，乜咁摶，怕唔怕？」
好味超人：「你話阿爺會做野。」
就係咁，我地結論係照冒險，希望阿爺可以出動保衞地球。呢幾日氣氛差些少，但係以摶反彈呢講今日都係要入場，所以我地都係認為要加貨，而呢一刻DJI都跌超過400點，已知既利淡因素有望一次反映出呢。貫徹越跌越買既原則，星期三開返市如果又做多個夠勁既低位我會再溝貨，期待後市唔係惡劣得咁利害的話有望出現短期反彈，玩的話都會係集中玩指數股為主，大家可留意一下。
Billy今日金句：
「雖然唔會連開十鋪細，但呢o的市多數第十鋪先開大，我可能未等到第十鋪就輸死左。」
「打風先去衝浪，感覺份外刺激。」
「阿爺千奇唔好開雙向直通車，如果唔係連香港死剩既人都反攻大陸，到時港股即瓜得。」
「雖然阿爺係保衞地球既超人，但可能變身都變唔切就比人打死左。」
2008年10月3日 星期五
阿爺救地球
如果大家有留意都知A50係上証既縮映，正常阿爺放假呢隻野應該橫行先ｏ岩，點知呢隻野呢兩日唔聲唔聲，升完又升，10月3日上午既呢一刻大市唔見400點佢都仲逆市上升，阿爺放假前上証收2293.78，上A收2408.88，A50當時收市$11.18，呢個星期HSI，DJI都唔見半成有多，但呢一刻A50對比不跌反升，對應上A仍然接近2400點，即係大家都睇阿爺復市之後唔會跟大圍跌，仲有可能升多少。
咁有乜啟示呢?當然係全世界都睇阿爺會頂住個股市，唔比佢跟外圍跌啦。呢個星期冇左阿爺睇住，港股即時跟住美國做淡，而家7000億方案都仲未傾掂，就已經有人唔生性話7000億過到都唔一定夠用，加上數據又差，DJI即時又插過，似乎呢個世界已經冇晒希望．．．呢個時候，大家唯有寄望社會主義既阿爺開動國家機器保衛地球。
之前雷曼爆鑊，阿爺反應超快，馬上呢三招組合拳救市，以救中國金融機構既曲線方式撐埋小布殊，當然呢個年代救美國即係救中國，救中國即係救美國。今次7000億膠著，阿爺又呢馬上出手救下樓市，A50亦因為憧憬阿爺開三中隨時做野，股價穩定左係11蚊上下，睇呢阿爺係有意透過A50向大家講:「保衛地球，阿爺有責!」
2008年9月30日 星期二
Wall Street 929 Judgment Day
美國史上最大救市方案比議會小比數否決左，當中好明顯係小布殊實力唔多夠，竟然連共和黨都蠢蠢欲動想玩野。加上兩個總統候選人各懷鬼胎驚死阿殊哥唔夠樣衰，一時話支持一時話睇下一時話玩下條件咁。急症病人去到急症室醫生仲話要傾下睇下點救法，問下呢個問下果個，咁既情況完全係廣東人所謂：「人多煮狗都唔冧」
之但係點解意見咁不一呢，呢個又要返返去民意上面，民調話原來支持政府七千億救市既市民只有30%，其餘多數係冇意見或者反對，咁既情況下，你係議員或者候選人都唔敢逆民意而行，我自己有好多美國親友，十個有九個都反對救市，歸納原因如下:
1. 原則上大家夾七千億救經濟冇問題，但而家好明顯係全民為金融界過去既貪婪負責，錢就iBank收，鑊就大家孭,呢o的乜野道理呀，唔見iBank搵到錢分錢比大家洗。
2. Investment Banker係美國幾大程度上係人民公敵，好多人覺得呢啲Banker其實係大炒友唔係實業家,求其亂炒，炒上佢又收錢炒落佢又收錢，仲要佢一日人工係普通美國百姓十年人工，之前大家已經好眼紅，要大家夾錢救佢， 好多人情願一鑊熟冇咁嬲。
3. 追源索始，今次金融海嘯源於樓市爆煲，有乜理由唔供樓既人走左去，銀行因此失左錢要大家夾返。樓市爆煲香港日本都發生過，呢啲地方會唔會叫大家夾錢補返個樓洞，人地炒樓炒輸左都係自己負責，銀行中招都係自已食返。
睇返歷史，Judgment Day之後往往係Resurrection Day，摶反彈，好時機。但睇呢呢幾日個市都唔會好得去邊，一來議會否決得個救市方案短期內就肯定唔會有乜新法子救市，二來呢幾日阿爺放假,想出政策曲線救市保衞地球都唔得，咁情況只有望個市跌勁啲產生超賣然後出現技術反彈，單靠一個因素入市似乎危些少，所以今個星期好味超人投資策略都係「情願走雞，好過中計！」
訂閱：
文章 (Atom)
